ಆಕಾಶ ಖಾಲಿಯಾಗುವುದಿಲ್ಲ!

ಆಕಾಶ ಖಾಲಿಯಾಗುವುದಿಲ್ಲ!

ಬಂದೇ ಬರುತ್ತಾನೆ, ಅವನು

ಸಂಜೆ ಮನೆ ಬಿಟ್ಟು ಮಾರು ದೂರ

ಓಡಿ ಹೋದವನು.

ಹಕ್ಕಿಗಳಂತೆ ರೆಕ್ಕೆ ಪುಕ್ಕ ಕಟ್ಟಿಕೊಂಡು

ಹಾರಲಾರದ ಮುಗ್ಧತೆಯಲ್ಲಿ

ಮನಸೋ ಇಚ್ಚೆ ಹಾರಾಡಿ, ಕೂಗಾಡಿ

ರಂಪ ಮಾಡಿ

ಬಯಲಿನಲ್ಲಿ ಬೀಡು ಬಿಟ್ಟ, ಕಾವಿ ಉಟ್ಟ

ಹಸಿ ಸಂನ್ಯಾಸಿ.

ಇವನಿಗೆ ಮಕ್ಕಳೂ ಮರಿಗಳೂ

ಇದ್ದಿದ್ದರೆ ಗೊತ್ತಾಗುತ್ತಿತ್ತು,

ಅಳುವ ಎಳೆಯ ತುಟಿಗಳಿಗೆ

ನಕ್ಷತ್ರಗಳ ಐಸ್ ಕ್ರೀಮ್ ತಿನ್ನಿಸುವುದು ಹೇಗೆಂದು

ಬಿಸಿ ಬೇಳೆ ಬಾತ್ ಗೆ

ಹುಸಿ ಮುನಿಸು ತೋರಿಸುವುದು ಹೇಗೆಂದು.

ಮನುಷ್ಯರೆ ಇಲ್ಲದ ಜಗತ್ತಿನಲ್ಲಿ ಅವನಿಗೇನಿದೆ ಮಣ್ಣು?

ಪ್ರೀತಿ ತೋರಿಸುವ ಕಣ್ಣು?

ಅದಮ್ಯ ಪ್ರೇಮ ಪರಿಧಿಯ ಬಿಟ್ಟು ನಡೆದು ಹೋಗಲು

ಅವನಿಗೆಲ್ಲಿದೆ ಕಾಲು?

ಬಂದೇ ಬರುತ್ತಾನೆ, ಇಂದಲ್ಲ, ನಾಳೆ.

-ಶುಭಾ, ಮರವಂತೆ